Бүгін, Қазақстан халқы Цифрландыру күнін атап өтуде, осынау маңызды кәсіби мерекемізде еліміздің мемлекеттік басқару жүйесін цифрландыру жолында өлшеусіз еңбек сіңірген көрнекті маман — Азиза Қырғызбайқызы Көпбосынованы ерекше құрметпен еске аламыз.
Азиза Қырғызбайқызы — Қазақстандағы электрондық үкімет пен мемлекеттік цифрландырудың негізін қалаушылардың бірі. Ол салық және қаржы жүйелерін, электрондық сатып алу процестерін автоматтандырумен айналысып, ең бастысы – Бірыңғай электрондық құжат айналымы жүйесін енгізу жобасын басқарды.
2000 жылдардың басында, цифрландыру жаңа ғана басталған кезеңде, Азиза Қырғызбайқызының жетекшілігімен «Ұлттық ақпараттық технологиялар» АҚ-ның әйел мамандардан құралған тобы 21 мемлекеттік орган мен 17 әкімдікті бірыңғай электрондық жүйеге көшіруді жүзеге асырды. Олар 100 000-нан астам мемлекеттік қызметшіні оқытып, қағазсыз құжат айналымының жаңа дәуірін бастады.
Ол басқарған команда Lotus Notes платформасында электрондық құжат айналымы жүйесін әзірлеп, құжаттарды тіркеу мен бекіту процесін бірнеше айдан бірнеше минутқа дейін қысқартты. Бұл шешім мемлекет үшін миллиардтаған теңгені үнемдеп, жұмыс тиімділігін арттырды.
Азиза Қырғызбайқызы тек кәсіби біліктілігімен ғана емес, нағыз көшбасшы ретіндегі адами қасиеттерімен де есте қалды. Ол командасын біріктіре білді, әріптестеріне қолдау көрсетіп, сенім мен ынтымақтастық мәдениетін қалыптастырды. Оның ұжымы Қазақстандағы мемлекеттік сектордағы цифрлық трансформацияның алдыңғы шебінде тұрды.
2014 жылға қарай Бірыңғай электрондық құжат айналымы жүйесі 93 орталық және 17 аумақтық мемлекеттік органда толық енгізілді. Бұл — Азиза Қырғызбайқызы мен оның командасының табанды еңбегінің нақты нәтижесі.
Өмірінде ресми марапат алмағанымен, Азиза Қырғызбайқызының еңбегі мен есімі Қазақстанның цифрлық мемлекетке көшу тарихында мәңгі сақталады. Ол кәсібилікті, эмпатияны және нағыз көшбасшылықты үйлестіре білген тұлға еді.
Автор: Азиза Шужеева
