Отырыс адами капитал және білім беруде жасанды интеллектті енгізу мәселелеріне арналған. Бірінші отырысқа Қазақстан үкіметінің өкілдері, сондай-ақ әлемнің жетекші университеттері мен компанияларының халықаралық сарапшылары мен ғалымдары, олардың арасында БАӘ, АҚШ және Қытай мамандары қатысты.
Президент жасанды интеллектіні дамытпай, жаһандық бәсекеге төтеп беру мүмкін еместігін еске салды. Цифрлық жүйелер мен жасанды интеллект егемен ел болудың кепіліне, экономикалық дамудың қозғаушы күшіне айналды.
– Сондықтан біз де осы ахуалға сай алдымызға биік мақсат қойдық. Қазақстан үш жыл ішінде толыққанды цифрлық ел болуы керек. Мен бұл туралы халыққа Жолдауымда жан-жақты тарқатып айттым. Жалпы, елімізде осы бағытта біраз жұмыс істелді. Мемлекет тарапынан көрсетілетін қызметтің 92 пайыздан астамы онлайн форматта ұсынылады. Былтыр еліміздегі қолма-қол ақшасыз төлемнің үлесі 85 пайыздан асты. Сондай-ақ биыл алғашқы жарты жыл ішінде Қазақстан азаматтарына 26 миллион цифрлық қызмет көрсетілді. Соның жартысына жуығы смартфон арқылы жасалған. Мұның бәрі де, әрине, жақсы. Дейтұрғанмен жасанды интеллектінің даму жылдамдығы өте тез, қарқыны жоғары. Сондықтан бір орында тоқтап қалмай, бұл іске үнемі жаңа көзқараспен қарау қажет, – деді Қасым-Жомарт Тоқаев.
Жасанды интеллектті әзірлеу жөніндегі кеңес Қазақстанда Президенттің Жарлығымен құрылған және елдегі ЖИ даму стратегиясын қалыптастыратын және салалық бағдарламалар мен стратегиялық құжаттар үшін ұсынымдар дайындайтын консультативтік-кеңесші орган болып табылады.
Кеңес қызметінің негізгі бағыттарына адами капиталды дамыту, ЖИ-шешімдерді енгізу, тәжірибе алмасу және жасанды интеллект саласындағы ұлттық саясат бойынша ұсыныстар қалыптастыру жатады.
