
Қазақстанда жасанды интеллект саласындағы кәсіпкерлік жаңа деңгейге көтеріліп келеді. Бұған Astana Hub ұйымдастыратын AI’preneurs акселерациялық бағдарламасының төртінші легінің нәтижелері дәлел.
21 тамызда Астанадағы Alem.AI халықаралық жасанды интеллект орталығында AI’preneurs төртінші легінің Demo Day шарасы өтті. Үш ай ішінде қатысушылар идея мен алғашқы гипотезалардан нақты өнімдерге, алғашқы клиенттерге, сатылымдарға және инвестициялық келісімдерге дейін жетті.
Бағдарлама қорытындысы бойынша стартаптардың жалпы сатылым көлемі $28,3 мыңды құрады. Сонымен қатар командалар жалпы сомасы $56,7 мың болатын мәмілелер бойынша келісімдерге қол жеткізді.
Инвесторлардың да қызығушылығы байқалды. Astana Hub Ventures екі стартапқа жалпы $75 мың көлемінде инвестиция салуға soft commitment білдірді. Оның ішінде Uniqore.ai үшін — $25 мың, ал Mineral Intelligence жобасына — $50 мың.
468 өтінімнен 16 стартапқа дейін
AI’preneurs төртінші легіне биыл 468 өтінім түскен. Олардың арасынан 74 қатысушы іріктеліп, үш ай ішінде 16 AI-стартап құрылды.
Бағдарламаның басты ерекшелігі — технологияны әзірлеумен ғана шектелмей, оны нақты бизнеске айналдыруға бағытталуы.
«Үш ай ішінде қатысушылар 16 AI-стартап құрды, алғашқы клиенттерге, пилоттық жобаларға және инвестициялық келісімдерге қол жеткізді. Бұл лег Қазақстанда AI саласында мықты таланттар мен кәсіпкерлік командалардың қалыптасып келе жатқанын тағы бір көрсетті», — деді Astana Hub бас директоры Мағжан Мадиев.
AI түрлі салаларда қолданылып жатыр
Demo Day барысында ұсынылған жобалар білім беру, қаржы, құрылыс, контент, ресторан бизнесі, wellness және басқа да бағыттарды қамтыды.
Мысалы, Six7 — баланың математикадан берген жауаптарын талдап, қателерін анықтайтын және жеке оқу траекториясын қалыптастыратын AI-репетитор.
Barsum балалардың оқу дағдысын дамытуға бағытталған. Платформа баланың оқуын және мәтінді түсіну деңгейін талдап, ата-аналар мен мұғалімдерге оның прогресін бақылауға мүмкіндік береді.
Бизнес-процестерді автоматтандыру бағытында Uniqore.ai жұмыс істейді. Платформа компанияның ішкі процестерін талдап, автоматтандыруға болатын операцияларды анықтайды.
Ал CorePilot спорт секциялары мен білім беру орталықтарындағы сатылым процестерін автоматтандыруға көмектеседі.
AI’preneurs бағдарламасында қатысушылар технологиялық шешім жасап қана қоймай, оның нарықтағы сұранысын тексерді. Бағдарлама екі кезеңнен тұрды. Алғашқы төрт аптада қатысушылар кәсіпкерлік ойлау жүйесін дамытып, идея іздеп, командалар құрды.
Одан кейінгі он апталық Core Accelerator кезеңінде командалар MVP жасап, гипотезаларын тексерді, алғашқы клиенттермен жұмыс істеп, сатылымға шығуға дайындалды. Мұндай тәсіл стартаптарға ең маңызды сұраққа жауап беруге мүмкіндік береді: «Бұл технологияны кім және не үшін сатып алады?»
Осы тұрғыдан алғанда, жобалардың коммерциялық нәтижелері ерекше назар аудартады.
Мысалы, MYupgrade іскерлік іс-шараларды ұйымдастыруға арналған платформасын ұсынды. Оның функционалдары қатарында тіркелу, электронды бейдждер және синхронды AI-аударма бар. Бағдарлама аясында команда 5 млн теңгеге келісімшарт жасасты.
Қазақстаннан әлемдік нарыққа
AI’preneurs қатысушыларының бір бөлігі жергілікті нарықпен шектелмей, халықаралық бағыттарға да жұмыс істеп жатыр. Мысалы, HOOK wellness жобаларының АҚШ нарығына шығуына көмектесетін Go-to-Market платформасын әзірледі.
VentorMe.AI пайдаланушыларға университет таңдау, құжаттарды дайындау және дедлайндарды бақылау сияқты процестерде көмектесетін AI-платформа құрды.
Ал Mineral Intelligence геологиялық активтерді архивтік деректер негізінде жылдам бағалауға және Due Diligence жүргізуге арналған AI шешімін ұсынады.
Бұл жобалар AI технологияларының Қазақстандағы нақты мәселелерді шешумен қатар, халықаралық нарыққа бағытталған өнімдер жасауға да мүмкіндік беретінін көрсетеді.
Жобадан бұрын — команда
2026 жылы AI’preneurs бағдарламасы алғаш рет alem.ai базасында офлайн форматта өтті. Қатысушылар тәулік бойы жұмыс істейтін коворкингке қол жеткізді. Басқа қалалардан келген командалар үшін коливинг те қарастырылды.
Бағдарлама барысында стартаптармен кәсіпкерлер мен сарапшылар жұмыс істеді. Олардың қатарында Arbuz.kz, Aviata және Ticketon жобаларының негізін қалаушы Алексей Ли, сондай-ақ халықаралық нарықта жұмыс істеген және Y Combinator акселерациясынан өткен стартаптардың негізін қалаушылары бар.
Мұндай орта стартаптың тек өнімін емес, команданың өзін де дамытуға мүмкіндік береді. Өйткені технологиялық бизнес үшін идеяның өзі жеткіліксіз — дұрыс команда, нарықты түсіну және өнімді сата білу де маңызды.
Demo Day — соңғы нүкте емес
AI’preneurs қатысушылары үшін Demo Day үш айлық бағдарламаның аяқталуы болғанымен, стартаптардың дамуы енді жалғасады. Алғашқы сатылымдар, клиенттер, келісімшарттар мен инвестициялық қызығушылық — командалардың идеядан нақты бизнеске қарай қадам жасағанын көрсетеді.
Биылғы нәтижелер Қазақстанда жасанды интеллект саласында жаңа кәсіпкерлік орта қалыптасып келе жатқанын байқатады.
468 өтінім, 74 қатысушы, 16 AI-стартап, $28,3 мың сатылым және $75 мың көлеміндегі инвестициялық қызығушылық — AI’preneurs 2026 жаңа буын AI-кәсіпкерлерінің әлеуетін көрсетті.
Ең бастысы, бұл жобалар жасанды интеллектіні тек технология ретінде емес, білім беру, бизнес, қаржы, құрылыс және басқа да салалардағы нақты мәселелерді шешетін құрал ретінде қолдануға болатынын дәлелдеп отыр.
